جدل 60 / (تريكيل ) –
وَلايني موضحيكة هادي. قبل ما يوصل أخنوش والحزب ديالو (هاد الحزب ديالو فيها نظر) ..الموهيم قلنا قبل ما يوصل “موسيو عزيز” الى رئاسة الحكومة، كان طالق واحد البرنامج سْميتو 100 يوم 100 مدينة، وْعاطيها غير للدوران والطوطيح من مدينة لمدينة ( تكول بن بطوطة مول تحفة النظار في غرائب الأمصار وعجائب الأسفار )،.. زعما حكا والواد “شوفووونا ها حنا كنتواصلو مْع المواطنين”.
آسيدي مزيان هادشي ما كلتو عيب، ولكن اللي مبغاش يتصرط لينا، هو كيفاش الأستاذ المحترم أخنوش زار هاد لمْدون كلها واخا ما كان فداك الوقت، لا رئيس حكومة لا رئيس اتحاد سيدي قاسم لكرة القدم، وتا شي حد أصلا، ما كاليه جي زورنا وتواصل مْعانا،..في حين دابا وبْعدما رْجع رئيس حكومة ..هانتوما كتشوفو بعويناتكم، كيفاش المواطنين كيْغوْتو وكيطالبو فيه ويزاوْكو ويعوْرطو باش يتواصل مْعاهم، وميبقاش داير عليهم “عين ميكا” ..وتكووول آخويا واش بْغا يدّيها فيهم.
هاكا ومن بعد 100 مْدينة شحال هادي، رْجع دابا وَياااا للآساااف كيزور الأكثرية غير واحد لمدينة بوحديتها، اللي مرة مرة كيمشي ليها باش يدير شي مهرجانات ويحضر فشي حفلات فشي تيرانات وقاعات مغاطاة، ويضربو عليه الرش، وساعة ساعة ينوض شي “مناضل” ( منعرف علاياش كيناضلو بْعدا فداك الحزب).. ويبدا كيغوّت بواحد الصوت أوبيرالي (ديال بلعاني) “آآآخنوش رتاااح رتاااح سنواصل المسار (تا شمن مسار غتواصل ؟..قادْ آصاحبي غي القافية بْعدا، راه تيْكولو سنواصل الكفاح ماشي المسار) .
آسيدي نكولو كاع هاد زيارة لْمدون صْعيبة شوية حاليا، والسيد دابا عندو ما يدّار والمشاغل (الله يحسن عوانو) ما حيلتو للحكومة، ما حيلتو للمجلس البلدي، ما حيلتو للحزب، ما حيلتو للمازوط، ما حيلتو لبرميل النفط، ما حيلتو للأوكسجين، ما حيلتو للغاز، ما حيلتو لفوربس، ما حيلتو للبورصة، ما حيلتو “لساوند إنرجي”، ما حيلتو يقابل دوك الجورنانات والمواقع ديالو، ويشوفهم واش تيكتبو مزيان ولا خسر ليهم “لكلافيي” وفاض ليهم الستيلو..(إيوا دوْيو علينا وجيوْ علينا).
هادشي كلو نعاماس حنا مْراعيين ليه، وتا ديك 100 مدينة والزيارات غير الله يسامح، ولكن حاجة وحدة مبغاتش تفهم لينا، ألا وهي كيفاش شركة افريقا طلقات العام اللي فات مبادرة ديال 1000 فكرة، ..وْدابا هانتوما كتشوفو الخوت، القضية حامضة والناس مْحّاكين والأزمة ضاربة لبلاد، وما تفوبرات علينا هاد الشركة ومولاها ولو بحتى فكرة وحدة من دوك ألف فكرة، باش تخفض لينا ثمن المحروقات،.. وْفينما يطلع رئيسها للبرلمان ولا شي وزير من الحزب ديالو، يعطيوْها للبكا والنحيط ويبداوْ يتنخصصو علينا، وااا حكّا ما حْكّا والوضعية الاقتصادية..والسياق الدولي..وأوكرانيا وروسيا وجزيرة الوقواق.. وَإنمّا.. الغالب الله، هادشي معندنا منديرو.. وميمكنش لينا ندعمو المحروقات ..وْلاسامير غانم.. صْعيب الحال وووو أغاراس أغاراس.. بْلا بْلا بْلا..قرقبو عليها سوارت الربح.
صافي ؟ هذا جهدكم ؟ وْفين هي ديك الشعارات الرنانة ديال تستاهلو حْسن وميات مدينة ..ميات يوم.. وسبعالاف فكرة و256458 مُقترح و5 التزامات و25 إجراء و55 مليار وووو يلا ما درنا ليكم والو ضربونا بلحجر.
لا نستاهلو حسن فعلا..!..ونستاهلو حتى ما كثر كاع.